BBAA / Facultad de Belas Artes de Pontevedra Universidad de Vigo / Información básica

O Mestrado Universitario en Arte Contemporánea. Investigación e Creación consta dunha dobre orientación académica e investigadora. Académica no sentido de potenciar aquelas competencias inherentes á creación e a produción artística, en todas as súas variantes. E investigadora en relación á formación de estudantes cuxo obxectivo sexa a continuación da súa formación en programas de doutoramento.

Os contidos, obxectivos e métodos do mestrado están orientados cara a saídas profesionais heteroxéneas en consonancia coa demanda e a realidade social. Apostamos por unha perspectiva interdisciplinar que permita aos estudantes adquirir unha formación polivalente e versátil para desenvolverse en actividades relacionadas coa creación plástica en todas as súas modalidades creativas, a imaxe e os audiovisuais (deseño gráfico, videográfico, infográfico, páxinas web...) así como coa difusión e transmisión da arte (comisariado, xestión cultural, dirección artística, gabinetes pedagóxicos…).

En definitiva, toda unha gama de opcións que acreditan ao Mestrado Universitario en Arte Contemporánea. Investigación e Creación como un laboratorio creativo vivo e atento á totalidade.

O Mestrado en Arte Contemporánea. Investigación e Creación foi pensado para ofrecer respostas á crecente demanda de profesionais polivalentes capaces de integrarse en campos de traballos interprofesionais. De aí que o plan de estudos se estruture sobre a base dunha concepción interdisciplinar atenta á necesaria versatilidade de coñecementos.

No campo da investigación os nosos esforzos céntranse na posta en práctica de sistemas de indagación e aprendizaxe que permitan ao estudante desenvolver traballos de investigación de xeito autónomo nun contexto de formación continua, supervisada e tutorizada polos docentes do mestrado..

Se ben os licenciados e graduados universitarios en Belas Artes terán prioridade sobre o resto dos solicitantes, o mestrado está destinado aos titulados universitarios procedentes do ámbito das Humanidades (Historia da Arte, Filosofía, Comunicación Audiovisual, Humanidades) e Arquitectos que desexen acceder ao mundo da arte contemporánea nas súas vertentes teórica e/ou práctica, ou ao campo da investigación.

Non obstante, a comisión académica valorará as solicitudes dos titulados pertencentes a outras ramas.

Poderán acceder ao Mestrado aqueles candidatos que estean en posesión dun título universitario oficial español e outro expedido por unha institución de educación superior do EEES que facultan no país expedidor do título para o acceso a ensinanzas de mestrado..

Así mesmo, poderán acceder os titulados conforme a sistemas educativos alleos ao EEES sen necesidade de homologación dos seus títulos, logo de comprobación pola Universidade que estes titulados acreditan un nivel de formación equivalente aos correspondentes títulos universitarios oficiais españois e que facultan no país expedidor do título para o acceso a ensinanzas de postgrao.

O acceso por esta vía non implicará, en ningún caso, a homologación do título previo do que estea en posesión do interesado, nin o seu recoñecemento para outros efectos que o de cursar as ensinanzas do Mestrado.

A Comisión Académica do Mestrado avaliará tanto a formación académica do candidato como o seu CV artístico e/ou profesional sobre a base dos seguintes criterios ponderados:

O Traballo Fin de Mestrado é unha materia de carácter obrigatorio tutelada por un profesor, cuxo obxectivo é mostrar a competencia creativa e investigadora do discente.

O devandito traballo consistirá na realización de obra artística (ou outro traballo de carácter creativo) ou nun traballo de investigación escrito, dependendo dos intereses particulares do alumno. En todo caso a obra proposta ha de ir acompañada dunha memoria escrita na que se expliciten os obxectivos do alumno. Na súa investigación o alumno deberá demostrar que é capaz de aplicar os coñecementos teórico/prácticos adquiridos ao longo da súa formación, poñendo en práctica a súa capacidade para buscar información, analizala, organizala e presentala axeitadamente.

Na presentación do TFM o alumno deberá igualmente demostrar que sabe utilizar a terminoloxía e as metodoloxías específicas, empregar procedementos de presentación axeitados aos requisitos académicos, e propoñer xuízos críticos fundamentados e aplicados ao seu obxecto de estudo.